soe hue palang ke saae jaga gaya
khidki khuli to asman kamre men aa gaya
angan men teri yaad ka jhonka jo aa gaya
tanhai ke darakht se patte uda gaya
hanste chamakte khvab ke chehre bhi mit gae
batti jali to man men andhera sa chha gaya
aaya tha kaale khuun ka sailab pichhli raat
barson purani jism ki divar Dha gaya
tasvir men jo qaid tha vo shakhs raat ko
khud hi frame tod ke pahlu men aa gaya
vo chaae pi raha tha kisi dusre ke saath
mujh par nigah padte hi kuchh jhenp sa gaya