Poet
maut ko ziist ki manzil ka pata kahte hain
rah-rav-e-ishq fana ko bhi baqa kahte hain
ahl-e-vahshat ka na kuchh pochhiye kya kahte hain
vo to apna bhi kaha un ka kaha kahte hain
un ke kirdar ki azmat ko bhala kya kahiye
itne achchhe hain ki achchhon ko bura kahte hain
qaid-e-guftar bhi hai bandish-e-raftar bhi hai
aise mahaul ko zindan-e-bala kahte hain
be-sada barbat-e-ḳhamosh ko kahne vaalo
sunne vaale to ḳhamoshi ko sada kahte hain
jo ghaTa chha ke na barse vo ghaTa kya hai ghaTa
haan agar TuuT ke barse to ghaTa kahte hain
ahl-e-haq dekh ke a.ina-e-hasti ‘kausar’
aks ka haal jo kahte hain baja kahte hain
Leave a Reply