Zubair Rizvi
ḳhurshid ki beTi ki jo dhupon men pali hai
tahzib ki divar ke saa.e men khaḌi hai
dhundla ga.e ranjish men us avaz ke shishe
barson jo sama.at se ham-aghosh rahi hai
ab tak hai vahi silsila-e-ḳhana-ḳharabi
ai ishq-e-sitam-pesha tiri umr baḌi hai
ham aa.en to ghairon ki tarah bazm men baiThen
ai sahab-e-ḳhana tiri ye shart kaḌi hai
Dasvaya hai phunkarte sanpon se badan ko
tab ja ke ye ik daulat-e-fan haath lagi hai
naqqad ke hathon men hain tanqid ke teshe
sahmi hui taḳhliq kitabon men paḌi hai
Leave a Reply