Aqaed Wahm Hain Mazhab Khayal-E-Kham Hai Saqi

aqaed vahm hain maz.hab ḳhayal-e-ḳham hai saaqi

azal se zehn-e-insan basta-e-auham hai saaqi

haqiqat-ashnai asl men gum-karda raahi hai

urus-e-agahi parvurda-e-ib.ham hai saaqi

mubarak ho zaifi ko ḳhirad ki falsafa-rani

javani be-niyaz-e-ibrat-e-anjam hai saaqi

havas hogi asir-e-halqa-e-nek-o-bad-e-alam

mohabbat mavara-e-fikr-e-nang-o-nam hai saaqi

abhi tak raste ke pech-o-ḳham se dil dhadakta hai

mira zauq-e-talab shayad abhi tak ḳhaam hai saaqi

vahan bheja gaya huun chaak karne parda-e-shab ko

jahan har sub.h ke daman pe aks-e-sham hai saaqi

mire saghar men mai hai aur tire hathon men barbat hai

vatan ki sar-zamin men bhuuk se kohram hai saaqi

zamana barsar-e-paikar hai pur-haul shoalon se

tire lab par abhi tak naghma-e-ḳhayyam hai saaqi

Leave a Comment