Poet
ulfat ye chhupaen ham kisi ki
dil se bhi kahen na apni ji ki
jaane vo kya kisi ki ji ki
jis ko ulfat na ho kisi ki
khvahish na bar aai apni ji ki
ham ne kis kis ki dosti ki
achchhi nahin sharh ashiqi ki
puchho na aji kisi ki ji ki
ye roe ki naama bah ke pahuncha
ashkon ne hamare qasidi ki
surkhi magar us ke lab ki dekhi
rangat hai safed aarsi ki
ashiq the vo ham ki baad apne
mitti hi kharab ashiqi ki
ai abr-e-shab-e-firaq sach kah
rote katti hai shab kisi ki
dil zulf-e-rasa talak to pahuncha
itni bakhton ne rahbari ki
bijli chamki to abr roya
yaad aa gai kya hansi kisi ki
ham kisi ki gali ki raah bhule
jo khizr ne bhi na rahbari ki
dil ko mire khaak men milaya
dilbar ne khuub dilbari ki
sozish mire dil ki dekh ai maah
kar sair is burj-e-atishi ki
vo tifl-e-nusairi aae shayad
qasmen duun murtaza-ali ki
gardan-zadani thi shama-e-sarkash
kyuun us ki gali se ham-sari ki
bas rakh diya khat men barg-e-sausan
jab likh na sake sifat misi ki
thukra ke chali jabin ko mere
qismat ke likhe ne yavari ki
ye rashk hai munh jo yaar dekhe
surat dekhun na aarsi ki
bhula tha main rah-e-ku-e-qatil
tu ne ai maut rahbari ki
us ke gardan talak na pahuncha
ai dast-e-daraz kotahi ki
dil ko paala baghal men tu ne
goya dushman se dosti ki
Leave a Reply