ai abr-e-tar tu aur kisi samt ko baras
is mulk men hamari hai ye chashm-e-tar hi bas
hirman to dekh phuul bikhere thi kal saba
ik barg-e-gul gira na jahan tha mira qafas
mizhgan bhi bah gaiin mire rone se chashm ki
sailab mauj maare to thahre hai koi khas
majnun ka dil huun mahmil-e-laila se huun juda
tanha phirun huun dasht men juun nala-e-jaras
ai girya us ke dil men asar khuub hi kiya
rota huun jab main samne us ke tuude hai hans
us ki zaban ke ohde se kyunkar nikal sakun
kahta huun ek main to sunata hai mujh ko das
hairan huun ‘mir’ nazaa men ab kya karun bhala
ahval-e-dil bahut hai mujhe fursat ik nafas
Leave a Reply