ye kaise zulm-o-sitam aur aziyyaten kaisi

Shadab Anjum

ye kaise zulm-o-sitam aur aziyyaten kaisi

paḌi hain mere hi pichhe musibaten kaisi

huun ghar men chain se bhuke hain mere hamsa.e

kisi ke kaam na aa.e to daulaten kaisi

hamari saḌkon pe bahti hain duudh ki nahren

hamen pata hai ki hoti hain jannaten kaisi

jo bhuuk se hain pareshan vo kab samajhte hain

ki kya hai za.iqa hoti hain lazzaten kaisi

bhara ho peT to aata hai lutf sajdon men

vagarna kaisi namazen ibadaten kaisi

na koi fatiha-ḳhvan hai na koi dast-e-dua

ye chaar su nazar aati hain turbaten kaisi

na jaane kaun sa chhiḌka hai aab gulchin ne

gulon pe chha.i hain ‘anjum’ ye dahshaten kaisi