Arshad Siddiqui
vo jis ne mere dil o jaan men dard boya hai
kabhi kabhi miri halat pe ḳhud bhi roya hai
baḌhe hue the miri samt kitne pyaar ke haath
kahan ye la ke tiri yaad ne Duboya hai
jo phuTi palkon se konpal to ja ke raaz khula
ki us ne gham nahin siine men zahr boya hai
tumhin batao ki kis kis se main kalam karun
ho tum bhi goya tumhari nazar bhi goya hai
faza hai tiira o tarik aur us ka ḳhayal
na jaane kaun si duniya men ja ke soya hai
chale phir uTh ke usi ḳhvab-zar men ‘arshad’
abhi to us ki nazar ka ḳhumar dhoya hai
Leave a Reply