Shahid Kamal
chashm-e-ḳhush-ab ki tamsil men rahne vaale
ham parinde hain isi jhiil men rahne vaale
ham ko raas aati nahin kucha-e-janan ki hava
ham hain alfaz ki tahvil men rahne vaale
kitne ashob gazida se nazar aate hain
usrat-e-ḳhana-e-takmil men rahne vaale
apne alfaz se tajsim karunga tujh ko
mujh pe va ho meri taḳh.il men rahne vaale
vus.at-e-zaḳhm ka tujh ko bhi nahin andaza
ai mire zaḳhm ki tavil men rahne vaale
kis liye karte ho tum harf-e-malamat se gurez
ham kahan sohbat-e-jibril men rahne vaale
mere lafzon ko bhi dete hain vo ayat-e-shifa
haan vahi hurmat-e-injil men rahne vaale
ja tujhe ‘shahid’ zi-jah ne azad kiya
ai mire hukm ki ta.amil men rahne vaale
Leave a Reply