Azhar Faragh
hansne-hansane paḌhne-paḌhane ki umr hai
ye umr kab hamare kamane ki umr hai
le aa.i chhat pe kyuun mujhe be-vaqt ki ghuTan
teri to ḳhair baam pe aane ki umr hai
tujh se bichhaḌ ke bhi tujhe milta rahunga main
mujh se tavil mere zamane ki umr hai
aulad ki tarah hai mohabbat ka mujh pe haq
jab tak kisi ka bojh uThane ki umr hai
ghurbat ko kyuun na main bhi shararat ka naam duun
divar-o-dar pe phuul banane ki umr hai
koi muza.iqa nahin piiri ke ishq men
vaise bhi ye savab kamane ki umr hai
Leave a Reply