Kahin Wo Chehra-E-Zeba Nazar Nahin Aaya

kahīñ vo chehra-e-zebā nazar nahīñ aayā

gayā vo shaḳhs to phir lauT kar nahīñ aayā

kahūñ to kis se kahūñ aa ke ab sar-e-manzil

safar tamām huā ham-safar nahīñ aayā

maiñ vo musāfir-e-dasht-e-ġham-e-mohabbat huuñ

jo ghar pahuñch ke bhī soche ki ghar nahīñ aayā

sabā ne faash kiyā rāz-e-bū-e-gesū-e-yār

ye jurm ahl-e-tamannā ke sar nahīñ aayā

kabhī koī tire va.adoñ kā tazkira chheḌe

to kyā kahūñ ki koī nāma-bar nahīñ aayā

phir ek ḳhvāb-e-vafā bhar rahā hai āñkhoñ meñ

ye rañg hijr kī shab jaag kar nahīñ aayā

mire lahū ko mirī ḳhāk-e-nāguzīr ko dekh

yūñhī salīqa-e-arz-e-hunar nahīñ aayā

na jaane zabt ke hāthoñ ‘sahar’ pe kyā guzrī

bahut dinoñ se vo āshufta-sar nahīñ aayā

Leave a Comment