Shauq Mahri
kuchh roz se pareshan vo zulf-e-mushkbu hai
mere hi hal-e-dil ki tasvir hu-ba-hu hai
ye kis ki aarzu hai ye kis ki justuju hai
kis ki talash men dil avara ku-ba-ku hai
ai be-adab ye kaisa andaz-e-guftugu hai
kambaḳht kuchh ḳhabar hai tu kis ke ru-ba-ru hai
phir koi zaḳhm taaza shayad milega dil ko
tamir-e-ashiyan ki phir dil ko aarzu hai
un ke karam ki hasrat un ke sitam ka shikva
muddat se ‘shauq’ apna mauzu-e-guftugu hai
Leave a Reply