Muhammad Fiaz Hasrat
jo maut hai zindagi ke pichhe to maut ke pichhe zindagi kyon
ghami ke pichhe bhi gar ḳhushi hai ḳhushi ke pichhe hai phir ghami kyon
ye nafraten ye kuduraten kyon hain aage sirat se suraten kyon
yahan hain maujud ab bhi insan phir adamiyat ki bandagi kyon
ye uljhanen kyon ye dard-o-gham kyon ye mushkilen kyon ye Thokaren kyon
mili to hain be-shumar chizen phir in ke badle bas ik ḳhushi kyon
ye bhi samajhne se huun main qasir ki aadmi kyon hua hai bartar
koi bata.e ki aadmi se yahan har ik shai hai qimti kyon
bas ek hi sham.a jal rahi thi hua tha saara chaman ye raushan
hain jal rahi ab hazar sham.en chaman men hai phir bhi tirgi kyon
har ek hasrat ye janta hai milegi mushkil ke baad rahat
to baad mushkil ke barha yaan paḌa hai mushkil men aadmi kyon
Leave a Reply