main abhi se kis tarah un ko bevafa kahun
manzilon ki baat hai raste men kya kahun
husn-e-be-hijab par koi parda Daal lo
tum use sanam kaho main use ḳhuda kahun
ai haris-e-mai-kada ḳhun-e-zindagi na pi
tu sharab agar piye tujh ko parsa kahun
gesu-e-siyah ki ye hasin daraziyan
raat kyuun kahun unhen raat ki dua kahun
tarjuman-e-raz huun ye bhi kaam hai mira
us lab-e-ḳhamosh ne mujh se jo kaha kahun
ghair mera hal-e-gham puchhte rahe magar
doston ki baat hai dushmanon se kya kahun
imtihan-e-shauq hai aisi ashiqi ‘nushur’
dil ka koi haal ho un ko dilruba kahun
Leave a Reply