Sirajuddin Zafar
zauq-e-numu ko manzil-e-dost men aa ke bhuul ja
is tarah be-niyaz ho sar ko jhuka ke bhuul ja
dagh-e-firaq ke siva hasil-e-ishq kuchh nahin
parda-e-jan-o-dil men ye sham.a jala ke bhuul ja
us ke harim-e-naz tak koi pahunch saka kahan
rahguzar-e-shauq ki ḳhaak uḌa ke bhuul ja
halqa-ba-gosh-e-ishq ho phir na zaval hai na maut
paik-e-qaza pe aḳhiri tiir chala ke bhuul ja
bazm men ai nigah-e-dost is tarah ahl-e-dil se khel
is ko miTa ke bhuul ja us ko bana ke bhuul ja
aa.e ḳhizan men jo kabhi yaad tujhe bahar ki
saghar-e-chashm-e-tar se do ashk baha ke bhuul ja
dil bhi ḳharab-e-ishq hai dil ko bhi de saza-e-shauq
is ko bhi tuur ki tarah aag laga ke bhuul ja
hasrat-e-did men jo hai diid men vo maza nahin
parda-e-ru-e-dost uTha aur uTha ke bhuul ja
tu bhi dayar-e-dost men shauq ke zamzame alaap
bad-e-shimal ki tarah Thokaren kha ke bhuul ja
satvat-e-qaisarana ko shaukat-e-ḳhusravana ko
jam-e-sharab-e-shq se honT mila ke bhuul ja
meri ghazal men hai ‘zafar’ lutf ba-qadr-e-zarf-e-zauq
tu use ga ke jhuum uTh ya use ga ke bhuul ja
Leave a Reply