afzaal-firdaus

Is Tarah Sataya Hai Pareshan Kiya Hai

is tarah sataya hai pareshan kiya hai

goya ki mohabbat nahin ehsan kiya hai

tujh ko hi nahin mujh ko bhi hairan kiya hai

is dil ne bada ham ko pareshan kiya hai

socha tha ki tum dusron jaise nahin hoge

tum ne bhi vahi kaam miri jaan kiya hai

har roz sajate hain tiri yaad ke ghunche

ankhon ko tire hijr men gul-dan kiya hai

mushkil tha bahut mere liye tark-e-taalluq

ye kaam bhi tum ne mira asan kiya hai

ye dil ka nagar aise to viran tha kab se

la-raib ise aap ne sunsan kiya hai

ye izzat-o-namus sabhi us ki ata hai

vo jis ne gadariye ko bhi sultan kiya hai

More Poems

Leave a Comment