Maqsood Wafa
ek ye dil jo tujhe de ke ganva dene laga
aur ik chiiz koi is ke siva dene laga
aisi ḳhushbu hai ki ab zabt nahin hai mumkin
main havaon ko koi raaz bata dene laga
ab mire samne rasta hi kuchh aisa hai ki main
apni manzil ko bhi raste se haTa dene laga
vo jise dekh ke jalne men maza lena tha
vaqt vo dagh-e-tamanna bhi miTa dene laga
jis ki gardish men mah-o-mehr hon dohra.e hue
aise manzar ko main mehvar se haTa dene laga
kya zamana tha tire vasl ki betabi ka
kya zamana hai tira hijr maza dene laga
ek hasrat men hua itna mujhe ranj ki main
haath aa.i hui duniya ko ganva dene laga
itna mahrum-e-tamanna huun ki ab aḳhir-kar
main ne jo chaha vahi mujh ko ḳhuda dene laga
ab-e-sada jo barasta hai dariche se pare
atish-e-mai ko zara aur baḌha dene laga
mujh ko sunna tha kisi aur zamane ne ‘vafa’
main kisi aur zamane men sada dene laga
Leave a Reply