Asad Rizvi
tumhin batao tumhara hai intizar kise
tumhari yaad satati hai baar baar kise
ye kis ki ankhon se barsega abr-e-sub.h-e-alam
shab-e-nashat bana.egi gham-gusar kise
lahu ka lams to ḳhanjar ke lab ne chuus liya
dikha.e rang-e-tabassum ye ashk-bar kise
khilengi kis ki tamanna.en sahn-e-gulshan men
nasib aa.ega vo mausam-e-bahar kise
ye doston ki navazish hai ai ‘asad’ varna
ḳhutut aa.e hain is tarah be-shumar kise
Leave a Reply