dhuum gum-gashta ḳhazanon ki machata phire kaun
in zamanon men jo the hi nahin jaata phire kaun
baagh men un se mulaqat ka imkan bhi hai
sirf phulon ke liye lauT ke aata phire kaun
siikh rakkhe hain parindon ne sab ashjar ke giit
aj-kal muuD hi aisa hai ki gaata phire kaun
main to kahta huun yahin ghaar men rah lo jab tak
vaqt puchho hi nahin shahr basata phire kaun
bhes badle hue ik shaḳhs ki ḳhatir hai ye sab
ham faqiron ke bhala naaz uThata phire kaun
ḳhvab ya.ani ye shab-o-roz jise chahiye hon
aa ke le jaa.e ab avaz lagata phire kaun
iḳhtilafat saron men hain gharon se baḌh kar
phir uThani jo hai divar girata phire kaun
Leave a Reply