sard na kar mazaq-e-ishq be-ḳhudi-e-namaz men
aankh ko durbin bana jalva-gah-e-majaz men
raz-e-nizam-e-ka.enat un ki nigah-e-naz men
asliyyat-e-ḳhuda nihan meri ḳhudi ki raaz men
phir tujhe DhunDh legi ḳhud zarf-shanas barq-e-tur
shauq-e-kalim shart hai ishq ke soz-o-saz men
ya to ḳhudi ko bhuul ja ya phir usi ko bhuul ja
hiss-e-mugha.irat na rakh bargah-e-niyaz men
ḳhirman-e-ka.enat ko phunk na de yahi sharar
soz hi soz hi faqat meri ḳhudi ki saaz men
quvvat-e-zabt vassalam taqat-e-sabr alvida.a
phir vahi irti.ash hai un ki nigah-e-naz men
mujh ko na azma.iye hashr bapa na kijiye
shor-e-nushur hai nihan nala-e-jan-gudaz men
tuur ko ḳhaak kar gaya shams ka ḳhun-baha gaya
laakh chhupa na chhup saka husn harim-e-naz men
talib gham-nasib ka husn-e-talab to dekhiye
arzu-e-firaq hai daur-e-vafa-e-naz men
Leave a Reply