shab-e-mah men jo palang par mire saath soe to kya hue
kabhi lipte ban ke vo chandni kabhi chand ban ke juda hue
hue vaqt-e-akhiri mehrban dam-e-avvalin jo khafa hue
vo abad men aa ke gale mile jo azal men ham se juda hue
ye ilahi kaisa ghazab hua vo samae mujh men to kya hue
mira dil bane to tadap gae mira sar bane to juda hue
chale saath saath qadam qadam koi ye na samjha ki hain baham
kabhi dhuup ban ke lipat gae kabhi saaya ban ke juda hue
abhi hain zamane se be-khabar rakha haath rakkhe ye laash par
utho bas utho kaha maan lo miri kya khata jo khafa hue
hain ajiib murgh-e-shikasta-par na chaman men ghar na qafas men ghar
jo gire to saaya hain khaak par jo uthe to mauj-e-hava hue
vo araq araq hue jis ghadi mujhe umr-e-khizr ata hui
shab-e-vasl qatre pasine ke mire haq men ab-e-baqa hue
kabhi shakl-e-aina ru-ba-ru kabhi tuuti aur kabhi guftugu
kabhi shakhs ban ke gale mile kabhi aks ban ke juda hue
na tajalliyan hain na garmiyan na shararten hain na phurtiyan
hama-tan the din ko to shokhiyan hama-tan vo shab ko haya hue
mire naale hain ki azal abad tire ishve hain ki lab-e-masih
vahan kun ka ghalghala vo bane yahan qum ki ye jo sada hue
gire zaat men to hai jumla-ust uthe jab sifat men hama-az-dast
kaha kaun ho to mile rahe kaha naam kya to juda hue
kiye us ne bazm men shoabde mali mehndi haath pe shama ke
jo patange raat ko jal gae vo tamam murgh-e-hina hue
mire dil ke dekho to valvale ki har ek rang men ja mili
jo ghate to un ka dahan bane jo badhe to arz-o-sama hue
vahi farsh-o-arsh-nashin rahe hue naam alag jo kahin rahe
gae dair men to sanam bane gae la-makan to khuda hue
jo tasavvur un ka juda hua dil be-khabar ne ye di sada
abhi ham-baghal the kidhar gae abhi god men the vo kya hue
kabhi sozishen kabhi afaten kabhi ranjishen kabhi rahaten
milin chaar ham ko ye neamaten tire ishq men jo fana hue
hamen shauq ye ki ho ek taur use zauq ye ki ho shakl aur
bane aag to bujhe aab men mile khaak men to hava hue
gae sar se jabki vo ta-kamar to alif idhar ka hua udhar
tira joda khulte hi baal sab pas-e-pusht aa ke bala hue
koi dab gaya koi mar gaya koi pis gaya koi mit gaya
tire ishve se jab se falak bane tire ghamze jab se qaza hue
mujhe gudgudi se ghash aa gaya to hila ke shana yahi kaha
abhi hanste the abhi mar gae abhi kya the tum abhi kya hue
kaho kafiron se karen khushi ki ye masala hai tanasukhi
mire naale khaak men jab mile to subu ke dast-e-dua hue
pas-e-vasl ham jo sarak gae to vo khilkhila ke phadak gae
kaha shokhiyon ne chalo hato ki huzur tum se khafa hue
tumhen log kahte hain naujavan ki ho biis tiis ke darmiyan
kaho mujh se ‘mail’-e-khush-bayan vo tumhare valvale kya hue
Leave a Reply