Syed Ahmed Shameem
unchi nichi pech khati dauḌti kaali saḌak
kitne sote jagte fitnon ki hai vaali saḌak
raat ki gahri ḳhamoshi TimTimati raushni
ek main tanha musafir dusri ḳhali saḌak
aate jaate laakh qadmon ke nishan ubhre magar
aaj bhi chikni nazar aati hai matvali saḌak
sab ke sab raahi musafir manzilon tak ja chuke
hai magar hadd-e-nazar ab naqsh-e-pamali saḌak
pi chuki sab aam ki ḳhushbu ko bu petrol ki
shahr se aa.i liye kaisi ye ḳhush-hali saḌak
us ke saare pech-o-ḳham ka raz-dan huun main ‘shamim’
dastan rakhti hai tafsili ye ijmali saḌak
Leave a Reply