Fariha Naqvi
tumhen paane ki haisiyyat nahin hai
magar khone ki bhi himmat nahin hai
bahut socha bahut socha hai main ne
juda.i ke siva surat nahin hai
tumhen roka to ja sakta hai lekin
mire a.asab men quvvat nahin hai
mire ashko mire be-kar ashko!!
tumhari ab use hajat nahin hai
abhi tum ghar se bahar mat nikalna
tumhari hosh ki halat nahin hai
dua kya duun bhala jaate hue main
tumhen takne se hi fursat nahin hai
mohabbat kam na hogi yaad rakhna!!
ye baḌhti hai, ki ye daulat nahin hai
zamane ab tire madd-e-muqabil
koi kamzor si aurat nahin hai
Leave a Reply