Khaqan Khavar
tire sitam ki zamana duha.i deta hai
kabhi ye shor tujhe bhi suna.i deta hai
shajar se TuTne vaale har ek patte men
tire bichhaḌne ka manzar dikha.i deta hai
jo dil men baat ho khulti nahin kisi pe magar
kahe jo aankh vo sab ko suna.i deta hai
main iḳhtiyar tumhen apna saunp duun kaise
kabhi ḳhuda bhi kisi ko ḳhuda.i deta hai
udaas raat ke angan men Dubta saaya
bichhaḌne vaale ka paikar dikha.i deta hai
ḳhizan-mizaj hai vo chhoḌ do use ‘ḳhavar’
vo mausamon ke safar men juda.i deta hai
Leave a Reply