Hadse Phail Gae Saya-E-Mizhgan Ki Tarah

Qateel Shifai

hadse phail gae saya-e-mizhgan ki tarah

gham-e-dauran bhi mila hai gham-e-janan ki tarah

laakh paivand umidon ne laga rakkhe hain

dil ki surat nazar aati hai gareban ki tarah

koi aflak-nashin hai to pukare mujh ko

hasraten khak-basar hain miri tufan ki tarah

aur honge vo mayassar hai jinhen lutf-e-bahar

ham to gulshan men bhi rahte hain bayaban ki tarah

jo bhi gul hai yahan firdaus bana baitha hai

kaun khilta hai yahan ghuncha-e-isyan ki tarah

ye bhi eajaz kahin bad-e-mukhalif ka na ho

dil uda jaata hai aurang-e-sulaiman ki tarah

khauf-e-mahshar se na ghabrao tum ai bada-kasho

dar-e-tauba bhi khula hai dar-e-zindan ki tarah

ham kiya karte hain ashkon se tavazoa kya kya

jab khayalon men vo aa jaate hain mehman ki tarah

na koi saaz na sangit na pazeb na giit

uf ye mahaul ki hai shahr-e-khamoshan ki tarah

ham tire misr men aae hain zulekha-e-shikam

bik na jaaen kahin ham yusuf-e-kanan ki tarah