Adeel Zaidi
tu jo chahe bhi to sayyad nahin hone ke
lab hamare lab-e-fariyad nahin hone ke
us ke kuche men miyan khaak udate kyuun ho
tum se majnun to use yaad nahin hone ke
koi achchhi bhi khabar kaan men aae yarab
aisi khabron se to dil shaad nahin hone ke
tu rahe ham se khafa kitna hi chahe lekin
ham magar tujh se to nashad nahin hone ke
kar-e-duniya ko hain darkar hamari umren
kar-e-duniya se to azad nahin hone ke
an-ginat jagte chehre gae mitti ke tale
ab nae zulm to ijad nahin hone ke
ta-qayamat vahi ik naam rahega abad
ham kabhi mustaqil abad nahin hone ke
khaak ho jaenge ye to hai muqaddar apna
ham magar vo hain ki barbad nahin hone ke
chahe namrud ho firaun ho ya ki ho yazid
sahab-e-shajra-o-aulad nahin hone ke
Leave a Reply