main pareshan huun milen chand nivale kaise
us ko daulat vo mili hai ki sambhale kaise
ungliyan apni naginon se sajane vaale
tujh ko lagte hain mire haath ke chhale kaise
ilm se pher liin tu ne jo nigahen apni
phir tire zehn men phuTenge ujale kaise
dekhte rah gae paani ki ravani ham log
raste logon ne dariya men nikale kaise
umr lag jaati hai ik ghar ko banane men hamen
makaḌiyan roz hi bun leti hain jaale kaise
tu ne ‘aḳhlaq’ qasam khaai thi zabt-e-gham ki
phir ye palkon pe nami honTon pe naale kaise
Leave a Reply