Farooq Anjum
ye vaqt zindagi ki ada.en bhi le gaya
qisse kahaniyon ki sabha.en bhi le gaya
us ne tamam shahr ko gunga bana diya
mere dahan se meri sada.en bhi le gaya
mausam laga ke zaḳhm gaya shaḳh shaḳh par
peḌon se phulon vaali rida.en bhi le gaya
suraj ne Dubte hue ham ko saza ye di
jismon se raushni ki qaba.en bhi le gaya
guzra tha apne shahr se ravan fasad ka
zalim mohabbaton ki katha.en bhi le gaya
‘anjum’ nirala chor hamen raah men mila
jo dil ke saath ham se dua.en bhi le gaya
Leave a Reply