Mahmood Shaam
nazar kisi ki nazar se nahin ulajhti thi
vo din bhi the ki yunhi zindagi guzarti thi
sitare apne liye ḳhvahishon ki manzil the
hasin raat hamen chandni pilati thi
rahe the apni havaon men ek umr magar
bikhar paḌe to har ik gaam apni hasti thi
yahi bahut tha ki kuchh log aa ke kahte the
vo mera zikr bahut muḳhlisana karti thi
nazar men pyaar bhi tha aur takallufat bhi the
kaha karenge kabhi ham ajiib laḌki thi
ḳhamosh rahti thi gahre samundaron ki tarah
vo ankhen jin se niri sha.iri bikharti thi
use mile to phir is baat ka suragh mila
hamen ye zindagi kyuun itni pyari lagti thi
na jaane kitne hi safhon pe dil bikhera magar
na kah sake to vo ik baat hi jo kahni thi
Leave a Reply