dil men utregi to puchhegi junun kitna hai
nok-e-khanjar hi bataegi ki khuun kitna hai
andhiyan aaiin to sab logon ko maalum hua
parcham-e-khvab zamane men nigun kitna hai
jama karte rahe jo apne ko zarra zarra
vo ye kya janen bikharne men sukun kitna hai
vo jo pyase the samundar se bhi pyase laute
un se puchho ki sarabon men fusun kitna hai
ek hi mitti se ham donon bane hain lekin
tujh men aur mujh men magar fasla yuun kitna hai
Leave a Reply