Faiz Ahmad Faiz
hasrat-e-did men guzaran hain zamane kab se
dasht-e-ummid men gardan hain divane kab se
der se aankh pe utra nahin ashkon ka azaab
apne zimme hai tira qarz na jaane kab se
kis tarah paak ho be-arzu lamhon ka hisab
dard aaya nahin darbar sajane kab se
sar karo saaz ki chheden koi dil-soz ghazal
dhundta hai dil-e-shorida bahane kab se
pur karo jaam ki shayad ho isi lahza ravan
rok rakkha hai jo ik tiir qaza ne kab se
‘faiz’ phir kab kisi maqtal men karenge abad
lab pe viran hain shahidon ke fasane kab se
Leave a Reply