aankh men partav-e-mahtab salamat rah jaa.e
koi surat ho ki ik ḳhvab salamat rah jaa.e
roz Dahe jaa.e ye haara tan o jaan ka lekin
Dher men ik dil-e-be-tab salamat rah jaa.e
vo kisi ḳhair ḳhazane ki ḳhabar deta hai
jo safina pas-e-sailab salamat rah jaa.e
dil kisi mauj-e-junun men jo lahu se likh de
aisi tahrir sar-e-ab salamat rah jaa.e
pyaar vo peḌ hai sau baar ukhaḌo dil se
phir bhi siine men koi daab salamat rah jaa.e
laakh vo shauq-sahifon ko jala len ‘ali’
raakh men ek na ik baab salamat rah jaa.e
Leave a Reply