Aijaz Asad
ishq men aisi paedari hai
teri laghzish bhi ham ko pyari hai
us ka munh moḌna qayamat tha
dil taḌapta hai zaḳhm kaari hai
tera kirdar to hai ma.amuli
aur dastar kitni bhari hai
aaj din bhar udaas udaas raha
tum ne kaise nazar utari hai
zindagi khel hai darame ka
har khilaḌi pe zimmedari hai
koi apna nahin laga mujh ko
ashna sab hain sab se yaari hai
sar-bulandi ata karegi tumhen
ye jo fitrat men inkisari hai
is ka jannat se vasta hi nahin
husn-e-aḳhlaq se vo aari hai
khiḌkiyan khol do zara ‘aijaz’
us ne shishe pe chonch maari hai
Leave a Reply