sannaTa Chha Gaya Hai Shab-E-Gham Ki Chap Par

sannāTā chhā gayā hai shab-e-ġham kī chaap par

sūraj ko thā yaqīn bahut apne-āp par

vo sā.iqa mizāj hai maiñ sard barf sā

hairat-zada haiñ log tamām is milāp par

maiñ huuñ fasurda shaam kī afsurdagī hai aur

dhundlā sā aks-e-yār hai yādoñ kī bhaap par

maiñ manziloñ kī justujū meñ thā ba-rañg-e-mauj

ab raqs kar rahā huuñ mohabbat kī thaap par

lāzim ye pesh-ḳhema-e-āfāt hai ‘ḳhayāl’

bejā jamā nahīñ haiñ parinde alaap par

Leave a Comment