tilsmati faza taḳht-e-sulaiman par liye jaana
mire ghar men utarti shaam ka manzar liye jaana
vo asbab-e-shikast-o-fatah ḳhud hi jaan ja.ega
alam jab haath se chhuTe to mera sar liye jaana
garaj ke saath bijli bhi chamakti hai pahaḌon men
musafir hai ki tufani hava ko ghar liye jaana
khule jaate hain jaise dil ke saare band darvaze
ab un qadmon ki aahaT kya sama.at par liye jaana
vahan sunte nahin hain dekhte hain zaḳhm-e-peshani
agar jaana to a.ina pas-e-jauhar liye jaana
gali ki ḳhaak muTThi men liye hain chahne vaale
‘zubair’ is kimiya ko tum bhi chuTki-bhar liye jaana
Leave a Reply