Tilsmati Faza taKHt-E-Sulaiman Par Liye Jaana

tilsmātī fazā taḳht-e-sulaimāñ par liye jaanā

mire ghar meñ utartī shaam kā manzar liye jaanā

vo asbāb-e-shikast-o-fatah ḳhud hī jaan jā.egā

alam jab haath se chhūTe to merā sar liye jaanā

garaj ke saath bijlī bhī chamaktī hai pahāḌoñ meñ

musāfir hai ki tūfānī havā ko ghar liye jaanā

khule jaate haiñ jaise dil ke saare band darvāze

ab un qadmoñ kī aahaT kyā samā.at par liye jaanā

vahāñ sunte nahīñ haiñ dekhte haiñ zaḳhm-e-peshānī

agar jaanā to ā.īna pas-e-jauhar liye jaanā

galī kī ḳhaak muTThī meñ liye haiñ chāhne vaale

‘zubair’ is kīmiyā ko tum bhī chuTkī-bhar liye jaanā

Leave a Comment