sitara TuuT ke bikhra aur ik jahan khula
ajiib ruḳh se andhere men asman khula
tulu-e-sub.h se pahle main chhoḌ ja.unga
siyah raat ke pahlu men ik makan khula
phir is ke ba.ad koi raah vapsi ki na thi
hava ke dosh pe is tarah badban khula
main jis ko DhunD raha tha udaas raton men
sitara ban ke vo palkon ke darmiyan khula
na jaane kaun mire ḳhvab le gaya mujh se
ki umr bhar na kabhi phir ye sa.eban khula
kabhi jo haath uTha.e ‘ravish’ dua ke liye
labon ke saath sama.at ka bhi guman khula
Leave a Reply