Khatm Hai Baadal Ki Jab Se Saebani dhup Mein

khatm hai badal ki jab se saebani dhuup men

aag hoti ja rahi hai zindagani dhuup men

chand ki aghosh men hone se jis ka hai vajud

khil sakegi kya bhala vo rat-rani dhuup men

us ki furqat ki tapish men main jhulas kar rah gai

varna itni taab kab thi asmani dhuup men

kuchh chamakta sa nazar aane laga hai ret men

badh rahi hai mere qadmon ki ravani dhuup men

ek saaya saath mere ham-safar ban kar mira

likh raha hai phir koi taaza kahani dhuup men