har gham ko yuun to zabt kiye ja raha huun main
is gham ko kya karun ki jiye ja raha huun main
lo saath de chuki shab-e-hijran ka zindagi
ab sham-e-gham ko saath liye ja raha huun main
haan aankh tar nahin magar aansu kahan se aa.en
hamraz ḳhun-e-dil to piye ja raha huun main
kaisa sukun ki dil bhi to hai dafn mere saath
ye saz-e-iztirab liye ja raha huun main
bhar bhar ke de raha hai falak talḳh jam-e-gham
kya zauq hai bala ka piye ja raha huun main
haan pa-e-sabr thak ga.e lekin idhar to dekh
ab sajda-e-ha-e-shukr kiye ja raha huun main
‘mani’ ye sozan-e-nafas-o-rishta-e-vafa
lab-ha-e-shikva-sang siye ja raha huun main
Leave a Reply