Poet
kab ka guzar chuka hai vo mausam shabab ka
ab zikr hai fuzul vafa ki kitab ka
fursat mile to dekh zara dil ka aa.ina
is men hai aks tere gunah-o-savab ka
chup-chap hal-e-ahl-e-nazar dekhte raho
hai kis ke paas vaqt saval-o-javab ka
har shaḳhs ghir gaya hai na.e iztirab men
toḌa hai jis ne qufl dar-e-iztirab ka
rakhta hai tere ru-e-hasin se mushabahat
har shaḳh par saja hai jo chehra gulab ka
kaafi hai us ki zaat ke irfan ke liye
mauj-e-hava ke dosh pe uḌna sahab ka
‘shahid’ jinhen ḳhabar hai rumuz-hayat ki
rakhte nahin hisab gham-e-be-hisab ka
Leave a Reply