kalam-e-sakht kah kah kar vo kya ham par baraste hain
lab un ke laal hain par laal se patthar baraste hain
bana gar qatra vaan gauhar to yaan gauhar baraste hain
hamare dida-e-tar abr se behtar baraste hain
araq rukh ka naqab-e-rukh se jab tapka to ham samjhe
ki mah par chha raha hai abr aur akhtar baraste hain
jhapakna jis ne dekha ho tiri palkon ka vo jaane
vagarna kaun maane gar kahun khanjar baraste hain
tamasha dekh sailab-e-bahari par hababon ka
utha la shisha saaqi abr se saghar baraste hain
tire dar par gada-o-shah ke ghash kha kha ke girne se
dil-o-jan bahte phirte hain sar-o-afsar baraste hain
sarishk-e-chashm se naale ravan hote nahin dekhe
kahe kaun is ko rona dida-ha-e-tar baraste hain
jala khirman to kya par jo dhuen uthte hain khirman se
sitam hai ban ke badal kisht-e-dushman par baraste hain
miri hasti magar fasl-e-bahar-e-shoala hai ‘nazim’
sharar phalte hain daagh ugte hain aur akhgar baraste hain
Leave a Reply