sochta huun ki use niind bhi aati hogi
ya miri tarah faqat ashk bahati hogi
vo miri shakl mira naam bhulane vaali
apni tasvir se kya aankh milati hogi
is zamin par bhi hai sailab mire ashkon se
mere matam ki sada arsh hilati hogi
shaam hote hi vo chaukhaT pe jala kar sham.en
apni palkon pe ka.i ḳhvab sulati hogi
us ne silva bhi liye honge siyah-rang libas
ab moharram ki tarah iid manati hogi
mere tarik zamanon se nikalne vaali
raushni tujh ko miri yaad dilati hogi
ruup de kar mujhe is men kisi shahzade ka
apne bachchon ko kahani vo sunati hogi
Leave a Reply