Wo Ek KHwab Ki Aankhon Mein Jagmaga Raha Hai

Shahbaz Khwaja

vo ek ḳhvab ki ankhon men jagmaga raha hai

charagh ban ke mujhe raushni dikha raha hai

vo sirf haq jo mire lab se ashkar hua

sukut-e-dair men ik umr gunjta raha hai

mire suḳhan men jo ik lau si thartharati hai

charagh-e-shab se mira bhi mukalima raha hai

mire liye ye ḳhad-o-ḳhal ki haqiqat kya

vo ḳhaak huun ki jise chaak phir bula raha hai

main sochta huun koi dasht kya sameTega

vo vahshaten hain mujhe ḳhud bhi ḳhauf aa raha hai

suḳhan ke a.ina-ḳhane ko ḳhair ho ‘shahbaz’

zamana sang-ba-kaf hai idhar ko aa raha hai