Mohammad Izhar Ul Haq
paḌe hue hain mire jism o jaan mire pichhe
hai ek lashkar-e-gharat-giran mire pichhe
pas-e-vafat ye be-dastaḳhat miri tahrir
nahin hai aur koi bhi nishan mire pichhe
mire mulazim o ḳhargah asp aur shatranj
sab aa.en nazm se matam-kunan mire pichhe
guzar rahi hai andhere men us badan par kya
na khul sakegi yahi chistan mire pichhe
uThi hui mire sar par azal se hai talvar
khinchi hui hai abad se kaman mire pichhe
ghira hua huun janam-din se is ta.aqub men
zamin aage hai aur asman mire pichhe
Leave a Reply