purani miTTi se paikar naya bana.un koi
din aa ga.e hain ki ab mo.ajaza dikha.un koi
pukarte hain ufuq ḳhaak be-sifat hui
zamin se shajar-e-aftab uga.un koi
asa buland karun sar-kashida lahron par
fasil-e-ab uTha.un hava chala.un koi
siyahiyon men chhupe hain dilon ke a.ine
kahin se partav-e-gum-gashta DhunD la.un koi
tarash luun koi jumla lab-e-ḳhamoshi se
charagh-e-harf sar-e-taq-e-shab jala.un koi
ghubar-e-rang men bhaTki hui hain ḳhushbuen
hava ka haath banun rasta dikha.un koi
zamin se lauh-e-falak tak hujum-e-chashm-o-sada
bikhar chuka huun bahut da.era laga.un koi
Leave a Reply