bana bana ke aks ḳhadd-o-ḳhal rakh diye ga.e
ki aa.ine haTa diye ḳhayal rakh diye ga.e
jo baat qatl ki ga.i vahi to ek baat thi
suḳhan-sara-e-vaqt men malal rakh diye ga.e
koi na ḳhud ko pa sake ye aur baat hai magar
kami kaji ke rang men kamal rakh diye ga.e
kabhi jo ek shahr tha qafas bana diya gaya
jahan bhi rakkhe ja sake the jaal rakh diye ga.e
daraḳht kaaT kaaT kar kushadgi to ki ga.i
saron pe jalti dhuup ke vabal rakh diye ga.e
kabhi jo haq diya gaya to is tarah diya gaya
ki faisle ke darmiyan saal rakh diye ga.e
dilon ko chhu ga.i thi jo vo tazgi nahin rahi
bhale se ab suḳhan men sau kamal rakh diye ga.e
mohabbaton men chahiye thi puḳhtagi so is liye
firaq rakh diye ga.e visal rakh diye ga.e
vo shahr be-misal tha vo shahr la-zaval tha
phir us ki iinT iinT men zaval rakh diye ga.e
Leave a Reply