Ishq Ki Mere Jo Shohrat Ho Gai

ishq kī mere jo shohrat ho ga.ī

yaar se mujh ko nadāmat ho ga.ī

ḳhaak arz-e-mudda.ā us se karūñ

jis ko bātoñ meñ kudūrat ho ga.ī

yaañ se jaane ko haiñ vo āchuk kahīñ

kyā balā ai abr-e-rahmat ho ga.ī

ab sitam aġhyār par karne lage

mere mar jaane se ibrat ho ga.ī

jalva-e-maanī nazar aane lagā

piite piite mai ye sūrat ho ga.ī

un kī bāteñ us ne bhī chhup kar sunīñ

aaj nāseh ko nasīhat ho ga.ī

mana-e-vasl-e-ġhair par hañs kar kahā

baare ab tum ko bhī ġhairat ho ga.ī

bū-e-gul us gul kī bū ke rū-ba-rū

fil-haqīqat be-haqīqat ho ga.ī

bas na farmāte phiro ye ‘sheftā’

go unheñ tum se mohabbat ho ga.ī

Leave a Comment