shahryar

Ummid O Bim

main ne aksar inhin ankhon ke dariche se tujhe

jhankte dekha hai

jab laghzish-e-anfas badhi

tund-o-pur-shor sadaon ka hujum

nur-afroz khalaon se ham-aghosh hua

main ne aksar inhin ankhon ke dariche men tujhe

Dubte dekha hai

jab talkhi-e-ehsas ghati

khamushi rakht-e-safar bandh chuki

tund-o-pur-shor sadaon ka hujum

zulmat-angez zamin-doz guphaon ka jigar

chiir ke

unghti tanhai men tahlil hua

main ne tu ne inhin ankhon ke dariche ke qarib

raushni rote hue nuur ke minaron ko

ashk bante hue girte hue dekha hai

to kyuun

andhiyan chalne lagin

khauf se kaanp uthin baaz darichon ki laven?

More Poems

Leave a Comment