”tumhen sabit karna hoga ki tum ho”! us ne mujhe jhinjhoda
”magar main ye sabit nahin kar sakti” main ne ehtijaj kiya
us ne mujhe mutthi men bhar kar zamin par bikher diya aur khushi se chillaya! ”tum sabza hi sabza ho, rang hi rang ho”
”thahro! zara socho! mujhe jald khizan ke nadida haath maadum kar denge…… tum ye sabit nahin kar sakoge ki main hun”
us ne ghabra kar mujhe phir samet liya aur zara tavaqquf ke baad faza men uchhal diya aur pur-josh ho kar bola
”dekha tum raushni hi raushni ho”
”han magar tariki mujhe nigalne ko betab hai! main ne kaha tha na main khud ko sabit karne se qasir hun”
us ne hirasan ho kar mujhe mutthi men jakad liyaa……. na-tamami ke dard se meri ankhen chhalak padin
us ne mujhe bahne ke liye nasheb men chhod diya aur muskuraya
”dekha tum maaya hi maaya ho”
”mujhe vaqt ki tez dhuup jald khushk kar degi” main ne duhai di
vo ghusse se kanpne lagaa…. phir mujhe samne rakh kar gidgidaya
”khud ko sabit karo khuda-ra nahin to main mit ja.unga!
hamari takmil zaruri hai”
”na-guzir hai! main ne taid ki
aao main tumhen zeb-e-tan kar luun! nahin to ham tasdiq ke haq se mahrum ho jaenge, ham kabhi sabit na ho sakenge”
”han hamen apni tasdiq karni hogi” us ne mujh men zam hote hue kaha
…aur phir ham ne dekha… rang… roshni… sabza… maya… husn aur hairat sab hamare butun ki jagiren thiin
bahar to sirf dhuan tha