tirgi hi tirgi hai bam-o-dar men kaun hai
kuchh dikha.i de to batla.en nazar men kaun hai
kyuun jalata hai mujhe vo atish-e-ehsas se
main kahan huun ye mire divar-o-dar men kaun hai
zaat ke parde se bahar aa ke bhi tanha rahun
main agar huun ajnabi to mere ghar men kaun hai
chaak kyuun hote hain pairahan gulon ke kuchh kaho
jhuk ke lahrata hua shaḳh-e-samar men kaun hai
jaise koi pa gaya ho apni manzil ka suragh
dhuup men baiTha hua rah-e-safar men kaun hai
kanpta ja dekh kar iz.har ki tajsim ko
sochta ja arzu-e-shisha-gar men kaun hai
bas zara biphri hui maujon ki ḳhu maa.il rahi
ahl-e-sahil jante to the bhanvar men kaun hai
shor karta phir raha huun ḳhushk patton ki tarah
koi to puchhe ki shahr-e-be-ḳhabar men kaun hai
main to divana huun ik sang-e-malamat hi sahi
lekin itna soch lo shishe ke ghar men kaun hai
Leave a Reply