nazar uTha ke jo dekha udhar koi bhi na tha
sulagti dhuup ki sarhad pe ghar koi bhi na tha
har ek jism tha ik poster shuaon ka
sulagte dasht men ThanDa shajar koi bhi na tha
chamakte din men to sab log saath the lekin
udaas shab men mira ham-safar koi bhi na tha
har ek shahar men tha iztirab ka aaseb
jahan sukun ho aisa nagar koi bhi na tha
sabhi ko fann-e-jarahat se vaqafiyyat thi
hamari tarah vahan be-hunar koi bhi na tha
sab apne kamron men masti ki niind so.e the
siyah shab men sar rahguzar koi bhi na tha
jo talḳh shaam ke sayon ko qatl kar deta
tamam-shahr men itna niDar koi bhi na tha
mire zaval ki sab ko thi aarzu ‘as.ad’
mire kamal se ḳhush-dil magar koi bhi na tha
Leave a Reply